Mit: Johanna Sebauer – Interview * Katharina Zanon * Christine Tippelreiter * Josef Maria Hader * Mario Huber * Robert Anders * Stephan Eibel * Ingeborg Schmid * Andrea Beatrix Schramek * Petra Pribitzer * Günther Pilarz * Maximilian J. Modl * Monika Schoberberger * Daniela Dangl * Hans Kumpfmüller * Christine Rainer * Matthias Hütter * Oliver Fahn * Franziska Zussner * Veronika Schneider * Maria Lehner * ChristiAna Pucher * Karin Seiner * Elisabeth Hafner * Andrea Heinisch * Hannes Thauerböck * Mario Schemmerl * Brigitte Thurner * Simon Scharinger * Karin Megla * Lea Jehle * Markus Manfred Jung * Andrea Ch. Berger * Engelbert Lasinger * Hans Anglberger * Gabriele Müller * Ulrike Titelbach * Anna Maria Lippitz * Dominik Leitner * flimmern.fischen
Rezensionen: José F. A. Oliver – In jeden Fluss mündet ein Meer * Christine Tippelreiter – fliagn kinna * Toxische Pommes – Ein schönes Ausländerkind
Zeichnungen: Eckholz, Oleg Estis
Preis: EUR 4.- (EUR 7.- außerhalb Österreichs)
Förder-Abo (4 Ausgaben): EUR 15.- (EUR 20.- außerhalb Österreichs)
Bestellung: Online, per E-Mail (dummail@gmx.at) oder unter 0664 / 4327973.
DUM-Interview: "WAS WIR WOLLEN IST EINFACH. … WIR WOLLEN, DASS MAN NINCSHOF VERGISST" mit Johanna Sebauer
Leseproben aus DUM 110:
AM BESN WEIBELE
(Katharina Zanon)
"Wasch, wenn anfoch nimma obchecksch, wo obn und untn is, sem weat jo im letschtn Loppatn woggilat."
Mai Olte muass es wissn. Und Olte hot nix mitn Olta zu tuan. So nennt man in Oschttirol anfoch sai Muata. Da Tatte is a da Olte. Is ka Belaidigung. Oba hez amol im eanscht: Mai Olte is olt. Mit mea als 70 weat man woll endlich amol olt sain deafn, oda? Fia "betogt" oda so ane kinschtlichn Heflichkaitn bin I anfoch selba schon zu olt. Des mocht man laicht als Gschropp, wenn man Schiss voa Oaschpania hot. Oba dea Zug is fia mi obgfoan, Fettn ghob! Dea foat hez iban Beagposs, doathin, wo di grauen Fetzn in di Tonnen hängen und selbscht im letschtn Loppatn woggilat weat. Woggilat is, wenn wos wogglt. Wos nit woggln sollt. Und des passiat bai so am Wetta gonz laicht mit da Tetschn.
"Wasch Kindskepfl, oamol bin I ibarroscht woan von so ana Neblschwadn. Woa grod am Weg aufs Bese Weibele in Oberlienz. Des hot saim Nome widamol olle Eare gmocht, do konnsch an drauf lossn, a wenn grod nit muasch, des sog I da! Jednfolls bin I so aufngschuacht, eh lai im Schneckntempo, angach hot mi de Zuckawattn von hintn dawischt. So huatig is des gongen, hot de mi aingmillt, dass I ma nit amol mea in Weg von de negschtn zehn Schritt dameakt hon. Komplett aingsogn woa I angach! In a poa Aichtln! Stellsche da des amol voa, Menschnskind! Koa Meglichkait, umzudrehn. Wail wo isn laicht auf amol hintn? Oda untn? Johoo, Schweakroft! Da Schweakroft noch, des redsch hez laicht dahea! Oba sem, I sogs da: Sem hesch nit amol du mea gecheckt, wo obn und wo untn, wo links und rechts, wo da Laib aufheat und da Laibhoftige onfong."
Fong schon oag on, I was. Oba schlimma gehts imma, des konn I enk vaschprechn.
...
WEIJDA
(Mario Huber)
du, heijt steijngans e net, göl?
ba sou an Weijda
heijt is net sou gfahrli
hot jo eh greijng
heijt is kua Feijst
und weijt seijgn tuast a net
heijt kau ma schua
auf die Schleijchweijg
muast nua an oundan nochfoan
weijns wiakli steijngan
dann hulns deijn zuwi
und du kaust weijdafoan
owa heijt steijngans e net, göl?
ba sou an Weijda
NEBLAUGN
(Petra Pribitzer)
mia kennan uns scho so long
mein gonzes lebn
und an guadn teu von deim
trotzdem waß i net ob du waßt
wer do vur dir sitzt
i konn da goa net sogn wie weh ma des tuat
dass du mi anschaust mit neblaugn
aus an novembagsicht
in dem nur hin und wieda die sunn durchkummt
und i füa an klan moment siach
du waßt genau
wer i bin
DA WEG INS UNGEWISSE
(Monika Schoberberger)
Mia foahrn durch Paris. Es is 1980, i hob de Stodtkort'n auf de Knia und vasuach mi zan Konzentrian. Da Martin is am Steia und frogt dauand: "Und jetzt, rechts oder links? Du muasst mia des schnölla sogn. Mia hobn do 6 Spuren, i konn net so gach hin und herfoahrn!" Er is g'nervt und i a, weu des Kort'n-Les'n is net so meins, owa foahrn drau i mi a net. "Do jetzt rechts", sog i und zoag mit da linkn Hond noch links. Martin reiht sich g'nervt links ein, er kennt mi jo schon. "Weiwa", denkt er si woarscheinli, "kennan de Richtungen null untascheid'n." Des erste Moi af unsan Liebesurlaub in da Stodt da Liebe und donn find ma unsa Hotel net. Heit hätt ma des Nawi eing'stöllt und damit sofurt hing'fund'n. Oda a net. Irgendwonn noch 2 Stund'n herumirren und in Hotöls frog'n, worn mia donn endli durt.
I sitz beim Martin und hoid sei Hond, er schloft friedlich, monchmoi seifzt er und donn geht a Ruck durch sein Körpa, a tiafa Atemzug und er schloft entsponnt weida. I lahn mi in dem bequemen Sessel z'ruck und moch de Aug'n zua.
...
MA SULLT IM NOWEMBA IWAHAUPT KANE BRIAF SCHREIBM
(Maria Lehner)
ma sullt im nowemba kane briaf schreibm, wal: dazumols hob i's taan, des woa a fööla dea neama zum guatmochn is. extra hob i mei füllfeda noch launge zeit wieda amal mit dintn aungfüllt und so laung umadumprobiert bis's neama potzt und neama krotzt. i hob ma denkt: schreibst eam, wal des kummt guat - wea schreibt heit no an richtichn briaf auf echtn papia?
wiar a fertich woa, wullt i 'n nou amal lesen in da frischn luft, oiso geh i aussi auf d'pawlatschn, schau fulla melankolie owi auf den agazibam, dem da wind die letztn blattln davontrogn hot. ollas vegeht und vawaht denk i ma.
oiso: steh i draußn mit dem blattl papier in da haund. so a guate luft, de mi umoamt und einhüllt wia in an wattamauntl. mei hian wiad so leicht. im nebl werdn die gedanken schinakeln und kriagn die obsätz fligln. klingt guat? jo schneckn, vielleicht fia an poetn. fia mia is's owa schlecht. des papiablattl wiad imma hölla und leerer. wia ausgsaugt. nebel iwaroll, so gschwind kaunnst gar ned schaun. mei lieblingssotz, in dem i da gsogt hob, dass du mei daham bist, hot si zu ana wolkn zsammgwuzlt und is ma davon gsegelt. na guat, dea sotz kaunn eh nouh bessa weadn. grod hot'n die neblwullkn um d'eckn trogn und jetzt vasteckt ea si woascheinlich im linkn eck fum liachthof im nochbauhaus.
...
