Mit: Fabian Faltin - Interview * Doris Nußbaumer * Tanja Raich * Jörg Zemmler * Annemarie Regensburger * Daniel Kindslehner * Elisabeth R. Hager * Didi Sommer * El Awadalla * Elis Rotter * Janus Zeitstein * Christine Tippelreiter * Erich Schirhuber * Othmar Plöckinger * Christian Schreibmüller * Manfred Kowatschek * Birgit Rietzler * Karin Klug * Th. Nenning * Emily Walton * Thomas L. Riff * Der Wortvertreter

Rezensionen: Richard Obermayr - Das Fenster * Iris Hanika - Das Eigentliche * Kristof Magnusson - Das war ich nicht

Preis: EUR 3,30.- (EUR 5.- außerhalb Österreichs)
Förder-Abo (4 Ausgaben): EUR 13.- (EUR 20.- außerhalb Österreichs)
Bestellung: Online, per E-Mail (dummail@gmx.at) oder unter 0664 / 4327973.

EXKLUSIV ONLINE:
Die ungekürzte Fassung des Interviews mit Fabian Faltin


Leseproben aus DUM 54:

A BÜD VO AN MAU
(Doris Nußbaumer)

Wiara dåsteht
bårtstopplat und foidarat
dülenkat und zaundirr
in da laungen grauen
znuddltn Untawäsch
und schwanert
und sudert und dazöht
wås a gestern
und vorgestern
und vorigs Jåhr
und vor zehn Jåhr
aa schau dazöht håt
wiara fuchtlt
und zoagt und deit
in da oan Haund de Tschick
in da aundan in Fruahstuckswei

denk i ma
waunn a net so flåch warat
kunnt i mi wenigstns
auf sein Knedl aussiredn
und miassat net zuagebn
dass i oafach
netta hirnlos
valiabt in eahm bi.


MADOIA
(Jörg Zemmler)

madoia, hot dr luis gsog, zun seppl, der sell isch grod von bam orgekuglt gewesn und dr seppl hot nix gsog ausser a longes "mmmmmmhh". nor hot dr luis net gewisst, wos tian, firn unfong, bis er holt verstonnen hot, dass er di bergrettung holn sollet. lei isch sell holt schun pled, hot sich dr luis gedenkt, die bergrettung zu holn, wenn dr sepp lei von bam orgfolln isch. hel geat jo net, hot er sich gedenkt. ober die normale rettung kimp holt net auer do, bis aufn berg. wos hot denn dr seppl, der tepp a gemiasst aufn bam aui klettern, do, wo se foscht schun ban gipfl worn? dr luis hot sein händi in dr hond und dr seppl sog "hmmmmmm" und "aaaaaaaaaahhhh". di carabinieri konn i net unriafn, denkt sich dr luis, weil i konn net walsch und di finanzer hobn mit der soch woll nix am huat, do bleib leimer di fuierwehr. na, denkt sich dr luis, di sell hom jo koan hubschrauber. schun isch dr luis dabei, in obmonn vo di schitzn unzuriafn, za frogn, wos er tian soll, do sog dr seppl, gonz heiser: "du, luisl, tasch mr bitte die marialuise unleitn, za frogn, wos 's heint z essn gib?"
...


ZWOA JAGA
(Didi Sommer)

wia amoi zwoa jaga midanaund duachn woid gaunga san,
hod auf oamoi dea oane den aundan daschossn - oafoch so!

und daun, oiso ob dem zeidbungdd,
sans nimma mea midanaund duachn woid gaunga, de zwoa jaga,
wei dea oane hod nimma rechd gee kina
und da aundare is danoch mea gsessn ...


MAUNAGSCHICHDTN
(El Awadalla)

da kuadt
bleibbd fuadt
da läo
haud ä o
da bäda
do gäda
da glaus
reissd aus
da odto
foad flodt o
glei rene ä
sogda renää
heasd aadi
ge draadi
und du boide
faroide


OWEFOAN
(Othmar Plöckinger)

Wira dosteht, heaschoftszeitn, ned zum oschaun is des. Und wira se do a nu debbad aussestesst, des wiad nix, des siag i jo glei, nix wiad des, nix. Kaunst de scho brausn ge, du seppl du! - - Wos is? Wos? Heast, gib a rua, i was scho söba, dass i glei drau bi - so a gnedl, a wichtigdurada.

Daun geh i iazt hoit hi. Ma, a so a schmarrn, heasst! I tua ma glei wos, dermossn saukoid is heit. Grod dass oan an beidl net aufedraht und eam ogfread! Und i dodl ste do mit nix ois an schas ois gwand. - - Wos, wos? Jo, eh, tua eh de steckn scho ausse. Scho wida dea gnedl, dea gscheite.

Oiso, dann pack ma's! Urdentli einistopfn de steckln hintam stabal, des iss wichtiga, dass gescheid herhoitn. Dena leg i iazt an aussestessa hin, dass staubt. Hoffantli san die schua gescheid zua, des warad a gaude, heast, oba ned fia mi. Tickt scho - tickt scho - tickt scho - uuuuunnnd auuuussseeee! Jo, joooo! Und iazt, iazt, iazt, steeessn, steessn, stessn!!

Und ind hocke, diaf, gauns diaf owe, gauuuns tiaaaf, und schiassn lossn. Jo, jo, hui, hui, hüdeife, do gehst heit oba owe, sakramentsakrament, do hots ozong, heast, übad nocht. De kuavn do, de is jo möadarisch wuan, und eis, verdaummt, so füüüü eis, dea mugö is jo kaum zum damanzn, depads eis, so a beidlad, ge heast, do, do die kuavn, jöööö, ned goa so grod, und iazt gleitn lossn, ned hudln, ned hudln, jooo, gleitn lossn, wia anam busn, jo, jo. Sodala, und duach! Oba voasicht, mandl, glei nu amol, doo kimmts ratatata! Übaaaa deeee daaaamiiiischn riiiibbaaaal nuuuu drüüübaaaa, dauuuun is gschoooofft! Gschooofft, gschoofft, gschofft!
...